التغيير ضرورة- انت واقف في وشك

انت قررت انك ستعيش ف امريكا.. حسنا فعلت…

بس انت عايز تعيش مصري مصري في امريكا.. مش عايز تعيش امريكي في امريكا…. اعتقد اننا متفقين ان ده اللي بيحصل

وطبعا.. مش هنكلم غير مصريين.. اصحابنا واصدقئنا مصريين.. نروح الكنيسة المصرية.. ووشنا “يكرمش” لما نتكلم انجليزي!

نقعد في الشغل منتكلمش غير عن الشغل.. ولو بيتكلموا في موضوع انا مش فاهم فيه.. يبقي مش هشارك.. اصل انا كمان مبعرفش اتكلم زيهم.. ومش فاهم هما بيهروا في ايه!

العيال بيتعلموا حاجات صعبه في المدارس.. وكله انجليزي.. بس انا مش من هنا.. !

انا لسه هتعلم حاجه جديدة؟.. يا عم انا هشتغل اكتر من شغلانه وكله هيبقي تمام وربنا هيبارك..

تعليم السواقة ده هم ما يتلم.. وبعدين انا مالي بترامب وللا اوباما وللا هيلاري.. هوه انا فاضي؟ مش نلاقي ناكل الاول؟

يا تري سمعت الكلام ده قبل كده؟.. ايوه.. ده كلام مجموعة كبيرة مننا احنا المصريين لنفسنا لما بنوصل امريكا… وبنقعد سنين وسنين بنفكر كده..

وبعدين نتنرفز… كان مالها مصر؟.. انا ايه اللي جابني؟.. م رب هنا رب هناك!.. واحنا كده كده مش مرتاحين.. ايه الهم ده؟

شوف.. كل الكلام اللي فوق ده حصل مع اغلبنا.. فيه اللي كمل وطالع عينه.. وفيه اللي رجع بلده.. وفيه اللي نجح وعمل لنفسه ولعياله مستقبل!

علشان ترتاح.. امريكا بلد عظيمة.. وفيها فرص بالعبيط..وفيها اختيارات كتيره..

المشكلة مش في امريكا.. المشكلة فينا..

كتير مننا مستني امريكا تعمل حاجه عشانه.. او ان الناس تساعده انه يوصل.. او انه ممكن يوصل للي هوه عايزه من غير ما يتغير!

واحد كان بيقولي..” أنا مستعد اشتغل اربعة وعشرين ساعة في اليوم بس اوصل”.. قلتله انت هتوصل طبعا.. بس هتوصل للاّخره!

انا هقولك حاجه محدش هيقولهالك..

في امريكا احسن استثمار فيها هو استثمارك في نفسك..!

“ده اللي هوه ازاي؟”

شوف..انت لازم واحدة واحدة تفرمت مخك.. وترمي كل اللي بيعطلك في الزبالة.. وبطل حجج وخيابه..

علي فكرة.. مفيش حاجه هتحصلك هتخليك “هوب .. تك تك..فوق” زي علي بيه مظهر..

الموضوع محتاج انك تستعد للفرصة.. عشان لما تجيلك تكون جاهز..!

هديك مثال:

كنت بتكلم عن محمد علي كلاي.. الاسطورة الامريكية..

واحد قاللي.”. مش ده اللي ساب المسيح وأسلم؟.. اهو ربنا جابله شلل رعاش واللزهايمر ومات..”

شوف.. لو انت بتفكر كده.. يبقي انت بالنسبة للثقافة الامريكية وللشعب الامريكي عنصري ومتطرف..

زي ما انت حر.. غيرك حر في قناعاته.. لكن الكل يحترم القانون..

محمد علي زي غاندي زي الدالاي لاما زي مايكل جاكسون زي ترامب.. له مزايا وعيوب.. مش من ضمن عيوبه انه كان مسيحي وأسلم..

مفيش حد وحش عشان لونه.. انت بس متعرفش الثقافة بتاعته فمش عارف تتواصل..ومش عارف ازاي تتواصل معاه عن طريق الثقافة الامريكية لأنك جيت امريكا ومش عايز تتأمرك.. ولانك مستنيه يفهم الثقافة المصرية علشان يبقي صاحبي وحبيبي وكفاءة.. وتقعد تضحك علية لما يقول “ملوهيه”!

مالكش دعوه بالهندي اللي لابس حاجه على دماغه عشان حسب ديانته مبيقدرش يغسل شعره.. طالما مش مطلوب منك تفليه.. يبقي هوه حر..!

لازم نتغير.. بس السؤال.. نتغير ازاي؟..

شوف… اولا لازم تتعلم شوية انجليزي..  ومتقولش مفيش وقت.. لان ده ضروري.. والا …مصر اولي بناسها..

افتح التليفزيون الامريكي انشالله افلام كرتون.. ممكن تبتدي ببرامج الاطفال اللي موجودة بتعلم الاطفال الكلام.. اسمع واكتب مش عيب..

عايز حاجه احسن؟ اعمل كورسات علي النت.. ومتقعدش تميل وتتعدل.. اخد الكرس ده احسن ولا ده؟.. طب استني احضر بتاع الكنيسة لما يبدأ؟..طيب ما انا كويس و ممشي حالي..

اي حاجه أحسن من اللي انت فيه.. بس ابدأ وربنا يسهل..

ولو عندك سؤال انا ممكن اساعدك…

بس خلي بالك.. لا انا ولا غيري نملك كل المعلومات.. لازم تدور.. وتتعب شوية.. ده العادي!

شوف انت مش هتاخد منصب اعلي الا لما تكون بتعرف تتكلم وتكتب انجليزي.. واستحالة تبقي مدير في مكان في امريكا من غير لغة..

وللعلم.. انت محتاج الناس.. انت لازم تعمل شبكة معارف برة الكنيسة و المصريين.. لان اللي هيجيبلك شغل أحسن هوه اللي معاك كل يوم في الشغل.. انت لو دمك تقيل علي قلبهم مش هتترقي حتي لو كنت تستحق ترقية!

انت مش هتحط مصريين بس في الReference لما تقدم في وظيفه… مش بيبقي شكلها حلو..

لازم تقرأ.. اقرأ كتب بالإنجليزي.. لازم لازم.. ولو مش عايز تقرأ هات كتب مسموعة.. القراية هتعلمك كتير..

هات الانجيل بالانجليزي واقراه.. اقرأ في المواضيع اللي بتحبها.. بس لازم تقرأ.. انشالله تقرأ كتب عيالك اللي فحضانه.. لازم تقرأ

اعرف الاخبار.. عشان تعرف تندمج في حوار.. اعرف شويه سياسة وشويه رياضه وشوية فن.. واتكلم واتعلم..

معلش طولت عليكم.. بس علي فكرة.. كتير مننا فاكرين انهم مظلومين وان الدنيا واقفة فوشهم..

مش واخدين بالهم انهم هما اللي واقفين في وش نفسهم!